Morschach - Leibstadt

Am Fritig 11.1. isch de 1. Fasnachtstag z Morschach gsi. Also simmer ungeohnt früeh go schminke und scho gli hemmer d Nacht agfange mit em chline Marsch vom Schuelhuus ufe Dorfplatz. Dete isch d Suu useglah worde und d Froldis und miär hend es Konzert geh. Später sind den au eisch Opus C Voll Riniken zu üs gstosse. Mit Ihne zäme hets nomal es grösseres Konzert geh für die chli Morschächler Dorfbevölkerig. Währenddesse und danach simmer id Beize gange und hend die hiäsig Gastronomie unterstützt. Jede isch natürlich sehr Pflichtbewusst mit sim Getränk gsi, am nächste Tag hends hemmer ja schowieder früeh go schminke müesse.

Mit freud und elan hemmer üs am Samstig Mittag am Zwölfi ih üsem Schminklokal Mattli troffe um üsi Müede Chöpf wider ahzschminke. Chum isch die Schminki ufm Chopf hend die erschte scho wieder freudig tanzed und die einte hend sich im Hirsche scho wider es feins warms Getränkli gönt. Am 14:00 isch de Car losdüsed. Üse Carchauffeur hed üs sicher und sogar mit es paar gschichtliche Hintergründ zum atomkraftwärchige Leibstadt bracht, as Pure Guggesound vode Guggemusig Seifesüder. Chum ahcho hemmer dörfe üsi Instrument näh und hend üse erschti Uftritt gha. Jaa so richtig ihgheizt hemmer üsi Luune. Am 22:00 Uhr hemmer üs wieder troffe das mer üs hend chönne vorbereite füre Uftritt. Es isch nid irgend en Uftritt gsii sondern en Ufrtitt mit de Seifersüüder, de Gastgebergugge.
Sie hend zerscht elei Ufrtitt gha und den hemmer dörfe ufd Bühni zu ine stah. 
De Mayor vode Seifesüüder isch vor üs anegstande und hed s erschte Lied ‚Skyline’ ahzählt. Und bääääääm. Das Gfühl uf dere Bühni mit so vill tolle und guggebegeischterete Mänsche... meh as nur es Tränli wärt gsi. Es isch bombastisch, ussergwöhnlich und eifach saugeil gsii. S zweite Lied isch s ‚Price Tag‘ gsi. D Moderatore sind usm Schwärme nüm use cho, jaa d Dynamik hed gstumme. 
😂
Nachm gmeinsame Uftritt hemmer üse eignig Uftritt gha und hend de nomal so richtig chönne gnüsse. 
So und denn hemmer so richtig chönne de Töff ahlah am Fäscht. Die einte hemmer ade Shotbar im Chäller troffe, die andere hesch bim Jägere gseh und gwüssi hend d Liebi vom Läbe gfunde, gits öbe. Jaa es isch es tolls fäscht gsi mit viele tolle Erinnerige. 
De Car isch wie gewohnt am 2 gfahre, mier hends trotz massiver Schneefall uf Morschach gschafft. De Herr Buschauffeur cha äbe öbis. Vom 2.5 Stundeschlaf im Car isch den jede fröhlich und mit guten Gefühlen hei gange.
~Sarah T.

Merci nomal ad Guggemusig Seifesüder für d Iladig a üches Fäscht. Es het riesig Spass gmacht mit üch zäme üsi Jubiläums, Jubiläeä, Jubi... ah egal, z fiire. Bis ufs nächsti mal wemmer sich anem Fäscht gseht.

Für üs gahts am Samstig witer zude Arvi-Hyler uf Kerns zum CHäFEr.

 

Lueg üse gmeinsam Uftritt mit de Seifesüder a ->
https://www.youtube.com/watch?v=jdPtlxNfIQk

Download miAPP on: