Gelterkinden

Letscht Samstig, 16.3.2019, isch üse letscht Usflug gsi ide füfte Jahreszit. Es isch as cherusgaelti.ch 2019 - Guggä rock the leprechaun uf Gelterkinden gange. Aber zerst natürli wie immer s Gsicht amale i üsem Schminklokal.

 

Abgseh vo üs sind no es paar Passivmitglieder mitcho. Hend denk scho gwüsst, dass sie das nid verpasse döfid. Und es Stündli oder so später simmer denn au scho dete gsi.

 

Die ersti Station isch d Parade durchs Dorf gsi. Und obwohl quasi en Umzug gsi isch, isches doch sehr agnehm gsi zum laufe. Wenig später nachem Umzug ischs ab dur d Menge zu de erste Bühne gange. Aber wo isch die nume? Nach einigem Sueche und chli meh Verwirrig seitens em Personal, wo au nid gwüsst het wo die Bühni isch, simmer den doch eisch druf gstande und hend de ersti Uftritt a dem Abig geh. Es het zwar nonig so viel Lüt gha. Aber zum Ispiele eigentlich genau gnueg.

 

Alli usser d Sousis hend ihri Instument versorgt. Und die mit de grosse Töpf sind wenig später schowieder dur d Lüt gstampft. Mit ehnder viel andere Sousis. Oppe mit 30 Töpf hends später en Uftritt geh. Und au wenns wohl nid die kompliziertischte und längste Lieder gsi sind. Isches doch sehr Imposant gsi. Und a dere Stell no chli Schlichwerbig für d Sousiwanderig die wiedermal a Pfingste stattfindet. Letschtjahr sind det knapp 160 Sousis vo Schwyz uf Brunne gwandert.

 

De Rest het entweder de luutstarchi Uftrit glost oder isch halt ganz klassisch und gepflegt id Möscht. Schliesslich hets ja überall tolli Gugge gha die Ihres Repetoir zeigt hend.

De 2. Uftritt isch geg die 10ni uf einere vo de beide Hauptbühne gsi. Und all Lüt wo bim erste Uftritt gfehlt hend, sind dafür etz da. De Platz isch komplett volle gsi, also flächemässig meini. Und mer hend glaub au gspielt, dass de hinderst und letscht üs sicher ghört het.

 

Und da alle guten Dinge drei sind, hemmer um Mitternacht no de letscht Uftritt vo dere Saison geh. Es isch nomal en gemüetliche Uftritt worde und ich persönlich bi froh gsi, wo ich gwüsst ha, dass ich mini Lippe nümme fast jedi Wuche kaputt mache. Danach isch nomal jede, wo het möge, go fäschte gange.

Miär wärid ja wie immer um Punkt zwei abgfahre, wenn da nid de Car vo suscht öpperem im Weg gsi wär und üse Ahänger igsperrt het. Aber ja, heicho simmer ja glich.

 

Viele Dank am Cherusgälti Team für das tolle Abschlussfäscht, es het sehr viel Spass gmacht bi üch.

 

Das isch tendenziell mi letscht Bricht für das Jahr gsi. Aber wenn ier underem Jahr no meh lese wönd, denn tüend üch doch uf üsere Homepage für üse Newsletter amelde.

https://www.fronalpchessler.ch/verein/passivmitglieder/

 

Ich hoffe ier hend üch gsund trunke und bis baldrian.

Download miAPP on: